香港新浪網 MySinaBlog
« 上一篇 | 下一篇 »
Daynight | 22nd Jun 2010 | 意見, 體育 | (145 Reads)

今年世界盃的形勢真係七國咁亂. 強隊跌watt, 弱隊又冇大家想像中咁弱, 搞到目前為止大部份組別的形勢仍然不明朗, 大部份球隊依然還有一次機會打入十六強. 只有喀麥隆, 洪都拉斯同北韓係肯定被淘汰. 

A組: 其實大局已定. 本來法國都仲有一線生機 (只要烏拉圭大炒墨西哥至少三球而法國又炒南非至少兩球, 法國就可以憑得失球次名進級), 但點知係呢個時候籠裡雞作反, 連果一線希望都冇埋. 而家淨係睇烏拉圭同墨西哥邊個會以首名出線. 兩隊都唔想係十六強對阿根廷, 所以場波應該會幾好睇.

B組: 幾乎可以肯定阿根廷首名出線, 除非希臘大炒阿根廷而另一邊廂南韓又大炒尼日利亞, 但可能性唔大. 而家問題係, 次名的會係南韓定係尼日利亞. 前者就算打和都可以進級, 後者雖然已經輸左兩場, 但如果今場佢贏到南韓, 即使係一球, 都可以次名出線. 所以兩隊都不容有失. 

C組: 好亂, 四隊都仲有機會出線. 基本上邊隊贏到就可以入十六強 (除左阿爾及利亞, 即使佢贏左美國都會有可能因為得失球而輸俾斯洛文尼亞). 英格蘭如果想首名出線, 下場不但要贏, 仲要係大炒, 同時間希望美國果邊唔會大炒或輸波. 但以之前兩場的表現黎睇, 大炒的機會不大. 除非球少爺兵肯盡地一鋪之餘卡比路亦願意改變一下策略啦.  

D組: 同C組一樣亂, 情況同C組一樣: 要進級, 就一定要贏 (除左澳洲, 原因同阿爾及利亞一樣). 塞爾維亞要贏澳洲應該唔難. 問題係: 德國能唔能夠打贏加納? 呢個亦都係在下最擔心的地方. 唔贏, 就係咁先架啦.

E組: 荷蘭肯定進級, 而家淨係睇日本同丹麥果場邊個會贏. 論攻擊力, 丹麥佔優. 但論形勢釗則日本較為有利, 因為和波都可以次名進級.

F組: 又係立立亂. 巴拉圭對紐西蘭贏面應該幾穏陣. 但意大利能否打敗斯洛伐克真係一個大大的問號. 今場非勝不可, 不成功便成仁.

G組: 估唔到葡萄牙可以送北韓七個蛋咁巴閉. 但都因為咁, 佢同巴西就幾乎肯定可以進級. 科特迪瓦炒唔到北韓至少七八粒都唔駛旨意有機會. 

H組: 智利雖然有六分, 但依然有出局的危險. 西班牙下場一定要贏智利, 做到就肯定出線. 但能否以首名出線就要睇下瑞士糖果邊打成點. 所以西班牙下一場都會係一場硬仗, 再唔生生性性的話就要同大家講聲: adiós !!!


[1]

依家睇返都覺得好搞笑個戰果, 我只係期待阿根廷對德國, 是但一隊贏波好有機會拎冠軍!

Maggie
[引用] | 作者 Maggie | 2nd Jul 2010 | [舉報垃圾留言]



我支持德國, 但平心而論阿根廷勝算較大
而且, 巴西始終係奪冠的最大威脅

[引用版主回覆] | 作者 Daynight | 2nd Jul 2010