全香港人都係度講呢個話題, 在下又點可以唔講呢? 岩岩睇完兩邊個節目, 再睇左網上超過四千個的留言, 基本上主流的意見覺得:
- 亞洲星光大道比超級巨聲更似歌唱比賽, 後者似做show多d
- 劉美君的主持功力十分之曳
- "亞" 的評審比較專業
- 古巨基, 謝安琪, 側田冇資格做評審; 藍奕邦, 伍樂城, 郭偉亮就很不錯
- "超" 參賽者的水準比 "亞" 好得多
主持: 睇得出劉美君係極度緊張. 講野太快, 個節奏控制唔掂, 而且間唔中窒一窒食螺絲再整幾個dead air, 帶動唔到氣氛, 講野仲有d粗鄙 (你落番去啦 <--- 咁的野都講得出, 有失大體). 佢係今集的表現係完全唔合格. 另外一邊, 曾寶儀雖然冇劉美君咁不知所措, 但佢的表現亦都只係不過不失. 林曉峰的存在我覺得反而成為左佢的制肘, 因為佢地兩個唔係好夾. 台灣的超級星光大道同超級偶像都係得一位主持, 點解香港一定要有兩個呢?
評審: 其實睇牌面, 兩邊都係差唔多. Eric Kwok, 伍樂城, 藍奕邦絕對拍得住劉易達同埋吳國敬. 正如上面所講, 佢地的評論係比另外三位歌手評判好. 側田係人都知佢不擅辭令, 都唔知叫佢上去做乜. 謝安琪就好似網民所講咁: 佢做評審毫無說服力, 自己都唱唔掂就去judge人地咪即係五十步笑百步. 講真, "超" 的參賽者唔少都唱得好過佢啦. 古巨基, 唔知係咪剪接問題定係乜, 好多時講左等於冇講. 亦即係話, 佢好多野都係講緊廢話.
至於亞洲星光大道, 劉易達, Walter Ma 呢兩個隠形人唔該摺埋啦. 肥媽整體上算係合格, 起碼佢講的野係比較言之有物, 係對參賽者有d幫助. 吳國敬都唔錯, 不過發言的機會比較少 (肥媽玩哂). 周國豐節目未播之前我並唔睇好佢, 但睇唔出佢真係好有心機咁搵出每位參賽者的長短處, 然後再給予建議. 五位評審之中我覺得佢係最稱職的.
參賽者: 雖然我唔鍾意, 雖然我都想支持一下亞視, 但不得不承認 "超" 的質素係好過 "亞" 幾條街. 恨鐵不成鋼, 睇完 "亞" 果十一位參賽者, 佢地的整體質素可以話係水準之下. 我聽完佢地唱歌, 心諗: 咁的quality都入到廿四強, 被淘汰果班唔係真係差成咁呀話? 就好似最高分, 唱《逆光》果位妹妹仔, 根本就係k房水準. 唱《情永落》果位人兄, 唔知佢係咪一早俾 "超" 叮出局先參加 "亞" 的呢? 如果係的話, 抵死. 唱成咁仲想繼續落去? 仲有, 唱Jay《黑色幽默》的譚杏藍, 學GEM的外國腔, 但唱得好夾硬, 假音又唔掂, 最攞命的係: 好難聽. 不過, 點惡頂, 都唔夠唱《熱情的沙漠》的古卓文惡頂. 聽佢唱歌就好似聽緊泰山係度大嗌 "啊啊啊啊", 不過係用《熱情的沙漠》的拍子黎嗌. 其餘的, 除左唱《飛花》《楓》《黑色毛衣》果三位比較ok之外, 都十分普通.
賽制: 兩邊都十分騎呢. "超" 就係由每位評審決定每位參賽者合唔合格, 然後再出一個評分. 但個評分好多時同個每位評審的決定完全不一致. 就好似其中一位參賽者, 四位評判俾合格, 一位俾唔合格, 評分係52分. 但另一位參賽者, 五位評判都俾唔合格, 但都有47分. WTF? 最搞笑的係, 全集最高分的 (唱《逆光》果位) 有64分, 但唱得好果幾位只係得五字頭, 個評分真係得啖笑. 至於 "超", 完全冇評分, 邊個入選完全係由評審商議決定, 透明度十分之 "高".
製作: 先講亞視, 唉, 個廠真係細到冇朋友. D觀眾有就等於冇, 睇左成集都唔多感覺到佢地的存在, 個氣氛都係咁死氣沉沉. 基本上整個show都幾悶下, 相信不少人都冇再追睇落去的衝動. TVB ...... 係, 好多人好疊馬, 好熱鬧. 但個show睇落去好亂. 首先, 開頭有一百位參賽者, 但突然間就宣佈入圍果廿四位的名, 然後再揀十位未入圍 (其實一早已經選好) 的再比賽, 再選其中六位入圍, 居然兒嬉成咁? 如果係咁, 其餘果六十六位咪即係由始至終都係陪企? TVB冇病呀話? 第二, 超級巨聲的剪接 is complete horse shit !!! 淨係聽到每位參賽者唱幾十秒, 然後就到評判講野. 評判講左幾句之後就突然間到下一位參賽者唱歌, 係咁趕時間的話當初就唔好播乜叉野特輯啦. 人地 "亞" 的特輯同比賽都分開時段黎播, TVB痴左邊條孖筋呀?
總結: "亞" 勝在評審同主持. "超" 勝在氣氛, 參賽者的質素, 同埋個卡士陣容. 如果你問我邊個show好d. 我會揀超級巨聲. 因為好似某位網民所講, 參賽者先至係個show的主角, 佢地唔掂個show都唔會好得去邊. 而且 "超" 的確令人想繼續睇落去 (撇開慣性收視呢個因素). 不過點都好,兩邊都係開始起步, 唔好太快就判死刑. 兩個show我都會繼續睇, 希望大家都會有所進步啦.
