(為了更能夠表達心中所想, 以下內容全部改為口語化)
嘩, 過左成年, 個台灣樂壇搞乜呀? 入左冰河時期呀? 我唔知奧運係咪真係勁成咁, 可以搞到成個華樂壇死氣沉沉. 出左二百幾隻碟, 似樣而我又鍾意的十隻手指都數得哂, 搞到我今年想寫十大最愛大碟都唔得. 好明顯台灣都開始步香港的後塵, D歌越來越行貨, 越來越重複. 唱片公司學埋哂香港的衰野, 選歌保守到飛起, 編曲仲衰多兩錢重. 偶像派果堆, 一隻碟十首歌, 起碼有五六首係K到唔K, 同類型的我都唔知聽左幾千萬次幾乎一聽到intro果幾下generic到不得了的琴聲就想skip左去的悶蛋Ballad. 呢D悶歌同香港果D悶歌基本上冇乜分別, 只係個旋律好少少, 演唱者質素好過香港果D咁解. 本來我都唔係成日聽偶像派架啦, 不過唔知點解今年的作品零舍差過人囉. 卓文萱, 楊丞琳, 郭靜, 梁靜茹 ..... 全部都係咁.
當然, 我都唔係話聽左好多台灣碟, 唔敢話全部都係垃圾, 但最主流果堆真係好唔掂囉. 一線歌手幾乎全軍覆沒. 周杰倫絕對令人失望, 蔡依林學人出一張翻唱英文經典金曲的大碟 (佢英文係台灣黎講可能算係幾掂. 不過聽佢, 我不如聽王若琳, 順子, 我頭像果位好過啦), 梁靜茹話過唔係好掂, 蕭亞軒我都唔想再提, 唯獨SHE果張叫做聽得下, 頂得順.
順帶一提, 香港有好幾位歌手今年都出左國語碟, 但無一倖免, 全部已經被我打入悶碟的行列. (除左E神果隻, 因為我例牌唔聽佢的碟)
反而星光幫果班出的碟有番D料到. 楊宗緯果隻雖好大路, 但有幾首真係幾好聽, 蕭敬騰果隻都係. 林宥嘉雖然唔係我杯茶, 唔係好識欣賞佢的歌, 但《眼色》真係好得. 神木與瞳因為走不同的路線銷量比較遜色, 但音樂質素絕對唔差. 黃靖倫新碟雖然有D唔知想點, 但起碼有靚聲頂住. 最令人失望的一定係梁文音, 實力派歌手唱偶像派的歌, 阿欠連連.
2008年, 算係台灣樂壇最黑暗的一年. 歌手唱功好, 但歌悶到爆廠, 都係死. 下年話就話好多人會出碟, 但D歌分分鐘仲差過今年. 台灣碟銷量一年比一年差, 其實都唔係冇道理.
根本唔可以當係一般專輯黎睇,不過果5首新歌同ep真係麻麻地
仲以為邊個high大左
